- EL CAOC
- ACTIVITATS
- ARTICLES
- IMATGES
- COMUNITAT
- CONTACTa'NS
L'amassada generala del CAOC occitan se tenguèt a Vilanòva d'Òlt lo 25 de novembre de 2000. Enric Garriga relatèt las activitats pròpias e las participacions del CAOC, que la soma, tot compte fèit e rebatut, es impressionanta. Coma eveniment fòrt, se destacava la dictada occitana del 29 de genièr, co-organizada pel CAOC, transmetuda de Castras a Barcelona per video-conferéncia. Dins lo bilan d'ongan, èra de bon notar la collaboracion amb l'EOE que se tradusèt per una preséncia activa dels catalans a la XXVI Escòla. Los militants del CAOC èran autanplan presents a Tolosa lo 27 de mai per defendre la lenga occitana coma a València lo 9 de mai per onorar lo pòble catalan que resistèt a las tropas borbonicas en 1707. Las visitas del CAOC catalan en Occitània foguèron nombrosas : un romavatge qu'es un biais d'entreténer la fe : los actes oficials programats dins las rescontras son l'escasença pels elegits de parlar occitan, o al mens de se prononciar sus la defensa de la lenga. Al cap d'unas annadas, los participants troban tornar la fiertat de s'exprimir en occitan. Annie Rieu ne'n portèt testimòni que la Pujada li donèt enveja de devisar dins lo parlar dels aujòls. Al revèrs las visitas dels occitans en paises catalans son pas raras.
Un bon bilan fin finala ? Dins una letra que nos mandèt, lo President Marcel Baïche, excusat, s'exprimiá atal : "es besonh de quicòm mès energic que charradissas, quand, de pertot los gosses nos tornan mossegar". Dins una autra letra que mandèt a Enric Garriga, lo 4 de mai, pensava que las regions occitanas èran en epòca de vacas flaquas e qu'aportarián pas grand causa a L'Eurocongres. An aquel subject, Joan Amoros, present a l'Amassada, nos diguèt que las causas èran plan engatjadas e que lo Congres debutariá en Narbona al mes de febrièr. Lo secretari, Jacme Delmas, tanplan excusat, escribèt per regretar "que i aguesse pas d'organizacion clara del CAOC, pr'amor qu'avèm pas de far de torisme, avèm besonh de nos organizar e de préner de decisions sus aquel sicut. Prener decisions occitanas, (en majuscula). Diguèt qu'èra de remplaçar o si que non de renovelar l'associacion"per que i aguesse mai de pès a la volontat occitana dins lo dinamisme de l'escambi occitano-catalan".
Cristian Duthil, present, se junhèt an aquela demanda : per el, lo burèu de l'associacion foncciona pas vertadièrament. Enric Garriga, en realitat, s'encarga del secretariat... Pasmens, dempuèi ongan, una permanéncia es organizada a l'Ostal occitan de Pàmias. Avèm assegurat la parucion de 3 Letras del CAOC. L'amassada prepausèt de renovelar lo burèu e qu'aqueste se recampa mès sovent. Per la letra, dèu existir un comitat de redaccion, compausat del burèu e dels sòcis interessats, per melhorar lo contengut e la forma. Una redaccion comuna d'al mens un numerò del PLEC poiriá éstre envisatjat per 2001.
Lo rapòrt d'activitat foguèt adoptat amb 19 votzes favorables e 6 abtencions, (jos la basa dels presents).